Heilt kort

Meir julegreier. Litt ekstra fine julegåvelappar til dei gåvene eg har lyst skal vere ekstra fine å sjå på. Meir nye kort i kortgalleriet.

Vinterstrikk

Om hausten blir skapartrangen min ofte vridd over mot strikking. Det blir riktignok litt sying innimellom, men det er noko med det å krølle seg opp i sofaen med ein kopp te og eit strikketøy. Enten foran tv’en eller med ei lydbok eller radio. Hårbandet over er bestillingsvare, og eigaren virkar so langt nøgd. Jakka under er ei veksejakke frå nøstebarnboka, men utan hette. Den var kjekk å strikke, og krevde lite montering. Det likar vi! Skal tru kven som kjem til å få denne? Det poppar opp store magar både her og der, så ein eller annan stad skal eg nok få gjort av den.

Hjerte og bloggtips

Etter å ha tilbrakt litt hobbytid sammen med Solveig er det umulig å ikkje bli sjarmert av stilen hennar. Vi har nok ganske ulik stil interiørmessig, men etter ein tur på hytta hennar kan jo kven som helst få lyst til å ominnrede og fylle huset sitt med linputer, rustikke tavler, hjerter, englar, lys, antikvitetar, korger og andre lekre ting i den sjarmerande landstilen. Ho kan å sette det sammen så det blir ein varm, lun atmosfære, og utan at ein føler at tinga er “kopiert” frå ulike blad og bloggar. Eg føler meg priviligert som får vere gjest på Solberget!

Dette hjertet er laga etter Solveig sin mal, og sidan eg er veldig svak for hjerter måtte eg lage nokre sånne ein kveld. Dei passar kanskje ikkje så godt til min udefinerte, noko retroinspirerte interiørstil, men det får no so vere! Eg har brukt ullstoff til det store hjertet, og utklipp av ein tova ullgenser til det lille. Prikkane er laga med ein slags tjukk tekstilmaling på flaske. Ullstoffet kom i hus då eg kom over denne fantastiske bunken med stoffrullar på Fretex for ei stund sidan. Lucky me! Stoffa er tydelegvis gamle, men ubrukte og nydelege i fargane. Dei er ikkje merka med innhald, anna enn at det står cotton/wool på dei mønstrete. Og at dei garantert ikkje krympar. Om det gjeld for maskinvask gjenstår å sjå…

Om du som meg har begynt å leite etter juleinspirasjon er Sjarmerende jul ein veldig fin juleblogg med mange tips! Bak den står ei kreativ dame som har bloggen Sjarmerende gjenbruk, som også er verdt eit besøk.

Julekortproduksjon

Eg har latt kortutstyret mitt ligge framme ei vekes tid, i håp om å komme i gang med julekortproduksjonen. Det fungerte! Veldig kjekt å kunne sette seg ned og klippe og lime litt sånn innimellom. Då blir det mindre kreativt press enn om eg tok fram utstyret for ein kveld og bestemte meg for å lage ein bunke kort. Her er ein smakebit på årets påbegynte kolleksjon.

Eg har forsøkt å bruke opp ein del stempeltrykk og papirrestar eg har hatt liggande. Dei har ein tendens til å hope seg opp…No er restemappa litt tynnare, og eg har adskillig færre ferdigtrykte stempelmotiv. Pluss at eg fekk utfordra kreativiteten noko meir ved å tvinge meg til å bruke det som låg foran meg, og ikkje bruke alt utstyret fritt. Ganske fornøgd med resultatet. Mange bonusar her gitt!

Julegåveønskeliste

No er det mindre enn to månader att til jul, og dermed offisielt lov til å begynne å gle seg! Julegåveførebuingane mine er endeleg i gang, og fleire har spurt meg om kva eg ønskar meg. Eg hadde så bra uttelling på ønskelista på bloggen i fjor at eg prøvar meg igjen i år. Eg har dessutan lest på Grønn Hverdag sine nettsider at det er miljøvenleg å lage ønskeliste. Men eigentleg skulle eg ønske eg ikkje ønska meg noko som helst, for det mest fornuftige ville vere å seie at om folk ønskar å gje meg noko til jul kan dei heller gje pengane til nokon som treng det meir enn meg. Men eg er veldig svak for gåver også…Ei 50/50 deling ville vore supert! Så eg ønskar meg både geiter frå kirkens nødhjelp og gåvekort frå panduro. Så blir det kanskje ikkje heilt tomt for gåver med mitt navn på under juletreet…

Here it goes, i ikkje-gjennomtenkt rekkefølge:

• Pengar til gode formål
• Gåvekort på opplevingar, gjerne ilag med gjevaren, er alltid kjekt. Enten det er middagskalas i heimen eller kino, restaurantbesøk, teater og liknande.
• Fair-trade produkt, som te, sjokolade, kakao m.m.

• Gåvekort på den lokale gjenbruksbutikken eller Fretex.
• Strikkegarn i ull, gjerne av denne typen og i lyse fargar:

• Boka “Myk start” av May B. Langhelle. Nøstebarnboka er flittig brukt og treng konkurranse!

• Hengelås med kode på som eg kan bruke når eg låsar inne tinga mine på treningssenteret. Ein vakker dag kjem eg til å miste nøkkelen under trening…
• Treningsbukse type capri/under kneet. Gjerne ei svart  i microfiber. Enten tights eller meir baggy yogavariant.
• Kvite eller grøne lys som er laga av omsmelta stearinrestar. Er å få kjøpt på NMS gjenbruk over heile landet.
• Kubbelys (offwhite/kvit/brun) og serviettar. Dette er forbruksvarer som eg alltid blir glad for å få.

• Ein ny favorittkopp! Eg drikk store mengder te, og favorittkoppen har fått skår og glasuren er begynt å krakelere. Poul Pava har designa nokre herlege, naive krus utan hank som er å finne på Ting (ein butikk eg både elskar og hatar). Der har dei også desse krusa frå Wik og Walsøe som eg likar veldig godt:

• Heimelaga ting! Som hobbyfanatikar veit er kor mykje tid og omtanke det ofte ligg bak gåver som er handlaga. Dorullnissar også. Om du las det forrige innlegget mitt om ting ein kan lage sjølv: eg hadde blitt glad for alle tinga på lista.

• Ull, ull, ull! Ull i form av strømpar, singlet, strømpebukse/stillongs, strikkejakke og ullundertrøye er noko eg brukar så og seie heile haust- og vinterhalvåret. Eg hatar å fryse, og eg elskar ull! Til mi store fortviling er det nesten umulig å finne gensarar/jakker som inneheld meir enn 20% ull i vanlege klesbutikkar. Og eg har ikkje tolmod til å strikke til meg sjølv…Jakka under er eit eksempel på ei strikkejakke som fort kunne blitt ein favoritt.

• Strikkepinnar i bambus. Både rundpinnar og settpinnar. Det bråkar mindre når eg strikkar på nattevakt, og kjennest godt ut mellom hendene. Og så trur eg problemet med glatt garn mot glatte pinnar blir mindre framtredande.
• Gåvekort på butikkar som sel stoff, sytilbehør, garn, hobbybøker, scrapbookingutstyr osv.
• Glattetang til å rette ut mitt til tider volumiøse hår. Det treng absolutt ikkje vere ein fancy, dyr modell, for eg har ikkje tenkt å ha den til kvardagsbruk.

Og heilt til slutt: eg har ingen forhåpningar om å få alt dette! Men eg veit at det er nokon som kjem til å gje meg julegåver uansett, og her har de ei solid tipsliste. Eg er sjølv glad i å gje vekk gåver, og eg veit at det er kjekkare når eg har ein følelse av at det eg gir vekk er noko mottakaren ønskar seg. Lukke til med juleførebuingane alle sammen!

Enkle julegåver ein kan lage sjølv

Eg har fått oppmoding frå lillesøstra til ei venninne om å skrive eit innlegg med tips til julegåver ein kan lage sjølv. Fortrinnsvis av det enkle slaget, og gjerne strikke- og hekleoppskrifter. Her kjem nokre forslag!

Hekla trekk til presskanne. Eg er ikkje god på hekling sjølv, men denne såg ikkje så vanskeleg ut? (Bilde frå hekleogstrikkeoppskrifter.com)

Kjenner du nokon som skriv dagbok eller treng ei fin notatbok? Med denne teknikken kan ein lage ein personleg dekorasjon tilpassa mottakaren. Kjekt, enkelt og stilig. Kanskje du kan fylle ei bok med gode oppskrifter, legge ved forkle/kjøkkenhandkle/klutar el.l ?

Pulsvarmarar er eit overkommeleg prosjekt,og kjekt å få. Ikkje krever det mykje garn heller. Her er ei oppskrift eg kunne tenke meg å prøve. (Bilde lånt frå Elisabeths verden)

Her er eit par tova tøflar som er både fine og gode på foten.

Gå ein tur i fjøra og samle nokre fine fjøler. Skru dei ihop til noko fint, t.d. bildeoppheng, ramme, smykkeoppheng, knaggrekke osv.og fest augekrokar øverst så du har noko å henge det opp med. Slike smykkeoppheng har eg laga 3 av, og dei har hausta lovord frå fleire.

Har du symaskin og tilgang på stoff (eg har funne mykje bra handlenettstoff på bruktbutikkar), så er det ikkje veldig krevjande å sy handlenett. Her er ein grei framgangsmåte. Dekorer etter eige ønske, om du ikkje vil ha eit heilt enkelt handlenett. Eg brukar ofte tekstilmaling, men ein kan også klippe ut noko morsomt i stoff og applikere det på nettet.

Evaluen er populær blandt mange. Eg har strikka fleire, og synest den er grei å lage og sit fint på. Men ein kan med fordel legge opp færre masker enn det som står i oppskrifta. (Bilde lånt frå Evas univers)

Om du vil gå for ei gåve som kan etast, kan eg foreslå Pickles sin müsli. Kjempegod! Dekorer eit glas og heng på ein fin lapp, og du har ei sunn, god og miljøvenleg gåve:) Alternativt kan du lage supersunne knekkebrød. Desse har blitt ein schlager i mine kretsar iallefall. Pakk dei fint inn i ein cellofanpose eller ein kakeboks (ta ein gammal metallboks og dekorer den med feks maling eller stoff).

Perlestrikka pute i mjukt garn. Denne ville iallefall EG blitt glad for å få.

Lag nokre kort, putt dei i fine, blanke posar og gje dei vekk. Alle treng eit kort i blandt! Desse små korta er heilt enkle, og passar fint når ein berre vil skrive ei lita helsing f.eks når ein gir bort ei gåve.

 

Det var nokre eksempel på rimelege ting dei fleste kan klare å lage, utan å måtte skaffe seg masse utstyr. Elles anbefalar eg desse nettsidene for inspirasjon:

• Garnstudio
• Pickles
• Strikkeoppskrift.com

Og vinnaren er…

……(trommevirvel….) HEIDI!

Har miksa sammen ein bunke gamle og nye stoff til deg. Ikkje akkurat matchande materiale du får i hende, men eg håpar du klarar å nyttegjere noko av det.

(Eg brukte internett-teknologien til trekking denne gongen; RandomNumber.org. Smart ting! Og det teite bildet fann eg ved eit enkelt google-søk…)

Gåve til 2åring

Godaste nevøen har nettopp fylt to år! Og stakkaren fekk mjuk pakke frå tanta i år også. Men etter alt å dømme lir han inga naud når det kjem til leikar og bøker, så enn så lenge er det greit å gje vekk gåver som gledar foreldrene meir enn bursdagsbarnet. Forkle må ein jo ha når det snart nærmar seg tid for julebakst! Dessverre er det ingen butikkar som sel pepperkakeformer for tida, så gåva blei ikkje heilt komplett. Men det kjem jo ei jul.

Barnehagebarn får vel aldri nok joggebukser? Forbokstaven til mottakaren er trykt på det høgre beinet. Eg lagde sjablong av sånn gjennomsiktig klistrete bokomslagsting som eg ikkje kjem på navnet på (kontaktpapir?). Det funka iallefall som berre det!

Oppetter A’en har eg brukt symaskina til å brodere ei lang rekke små bilar. Som 2 år gamle gutar flest er også nevøen min glad i bilar, båtar, fly, gravemaskiner, lastebilar, brannbilar og helikopter…Og sidan faren er glad i å lære guten triks, overraska han somme av gjestane i bursdagsselskapet med å fortelle at framme i flyet heiter det “kåkkpitt” og han som styrer flyet heiter “pilotn”. Ordforrådet er det ingenting å seie på!

Forundringspakke og giveaway

Eg har vore så heldig å få ein forundringspakke! Ei venninne har gitt meg denne fantastiske kassen fylt med både det eine og det andre. Silkestoff, ullundertrøye-stoff, lerret, handklestoff, trådsneller og masse flott bomullsstoff av god kvalitet. Tinga har tilhøyrt grandtanta hennar, som ikkje lever lenger. Ho var visst ei nevenyttig dame, og det er ingen tvil om at ho hadde orden i sysakene. Nede i kassen dukka det opp ei liste på ein lapp. Der hadde ho skrive ned kva som fantest i kassen, samt kva det skulle brukast til. Datert 27/12/1975. Eg tvilar på at eg kjem til å fullføre planane hennar, blandt anna hadde ho sett for seg at ho skulle sy ei sykkeldrakt, men eg skal iallefall gjere det beste ut av noko av dette flotte materialet!

Og i god pay-it-forward ånd har eg lyst til å dele litt av godene med mine syglade lesarar. Dersom du har lyst til å få ein forundringspakke med diverse stoff (både frå forundringskassen og mitt eige lager) skriv du det i ein kommentar til innlegget, så trekk eg ein vinnar den 22/10.

Calorimetry og award

Eg har endeleg prøvd meg på desse smarte pannebanda. Ein god oppfinnelse for oss som gjerne vil halde oss varme på øyrene sjølv om håret er samla i hestehale. Og ein fin måte å få brukt restegarn på. Oppskrifta er på engelsk, difor tok det litt tid før eg turde å sette i gang. Men det var enklare enn venta, og no har eg laga nokre. Potensielle julegåver. For dei som vil prøve seg på det samme vil eg anbefale å legge opp færre masker enn det som er oppgitt i originaloppskrifta. Den første eg lagde vart veeeldig stor!

Og så har eg fått ein award! Det er jo sjølvsagt stas. Denne kjem frå Solbergets mange prosjekt, som eg har omtalt tidlegare. Ho har ein herleg blogg med fine bilete, varme tankar, og mange kreative prosjekt! Tusen takk, Solveig. Det betyr mykje å få ei slik utmerking frå ein sjefsbloggar som deg!

Og så må eg nevne at Fin i Formen har eit aldri så lite jubileum på bloggen sin. Ta ein kikk og bli inspirert du også!