Superfin barselgåve

Vi har fått utruleg mange flotte gåver etter at veslefrøkna kom til verda, og denne uroen er så fin at eg føler eg må dele den med blogglesarane mine. Den er samansett av mange små delar som alle spring ut frå eit stort tre. Til mi store glede har designaren nytta figurar som eg likar veldig godt; ugler, sauar, tre/blad, skyer, hus og sopp. Og fargekombinasjonane er så fine! Dei kvite delane lyser i mørket, noko vi ikkje har fått testa skikkelig enno sidan uroen foreløpig heng over vogga i stova der frøkna søv på dagtid. Men ho ligg ofte og kikar på dei mange figurane, både når ho skal sove og når ho ligg på leiketeppet ved sidan av vogga. Ei stund  begynte ho å smile kvar gong vi holdt ho opp slik at ho kunne sjå studere uroen på nært hald.

Tusen takk til T, T og M som var snille å gje oss denne artige og dekorative gåva!

Stova

Som nemnt tidlegare har mannen i huset fiksa opp stova, og både golv og veggar har blitt fornya. Her får du ein liten kikk inn i stova og kan sjølv vurdere resultatet. Eg er veldig fornøgd! Ser du på «før-biletet» under skjønar du kanskje kvifor vi har hatt lyst på endring ei stund.

Mørkt, slitt laminatgolv med altfor mange fargenyansar. Stripete tapet i varme beige tonar.

Vi likar godt å mikse gamle og nyare møblar og interiørgjenstandar, og med kvite veggar og lyse golv kom teakskjenken og -lampa (begge bruktfunn) meir til sin rett.

Vi har ikkje gått til innkjøp av verken nye eller gamle møblar etter forandringa, men dette bildet vart innkjøpt på Epla.no for å tilføre noko nytt på dekorasjonsfronten. Som vordande helsesøster syns eg det var både dekorativt, koseleg og humoristisk med eit bilde som etterlignar ei synstavle.

God helg til deg som kikkar innom!

Blå

Blå er ein bra farge. Eg har alltid likt blått, og er for tida inne i ein litt blå periode på interiørfronten. Her ser du nokre av dei kjekke sakene eg har kjøpt brukt i det siste. Mykje blått! Øverst: eit gryteunderlag som havna på kjøkkenveggen. At det også var fuglar på var ein kjekk bonus, sidan eg har blitt smitta av fuglebasillen.

Margarinskåla som står i vinduskarmen på kjøkkenet er også litt blå. Den kjøpte eg for 3 kroner på loppemarknad i fjor haust. (Den svarte boksen på kjøkkenbenken er ikkje eit bruktfunn, men ei super julegåve som inneheld det som teksten tilseier: knekkebrød. Genialt med ein fin og praktisk boks sidan det blir bakt og ete mykje knekkebrød her i huset.)

Er litt hekta på små vasar og flasker. Den blå fann eg på gjenbruksbutikken nyleg. Fargen er perfekt i entreen, som har andre blå detaljar.

Over vasane heng dette korsstingsbroderiet. Også eit blått brukfunn. Det er nok ikkje så veldig gammalt, men det ligg mykje arbeid bak. Eg likte bodskapen, og syntest det fortente ein plass i gangen vår.

Eg er redd for å bli like samlegal som mamma, og ser tendensen når eg ikkje klarar å gå ifrå vasar og telysestakar som desse. Men dei kosta jo ingenting, og tek seg fint ut i hylla i trappa.

Ny gamal kjøkkenduk med blå detaljar. Syns den var litt sånn bestemorkoselig og har ingen problem med å blande den inn i vår ellers nokså udefinerte stil.

Sist, men ikkje minst kom eg over desse Rørstrandtallerkane på fredag. Blågrønt og gult gir ein herleg retrofølelse. Eg plukka med meg 8 av 11, og måtte heim og rydde plass i kjøkkenskapet. Dei er i kjempefin stand, og passe store til å bli våre nye kvardags-brødskive-fat. Eg blir glad av å sjå på dei!

Nytt på veggen

Dette bildet blei til ein kveld eg og mannen kjende eit akutt behov for å henge noko på ein litt for tom vegg. Det vart litt i minste laget til å havne på veggen som var tom, men vi bytta litt om på ting sånn at det vart litt meir balanse i «veggpryden». No har det hengt der i nokre veker og eg kjenner meg sånn passe nøgd.  Det er ingen favoritt, men det får nok henge der ei stund til.

Basisen for bildet er eit djupt lerret på 30 x 30 cm, og eg har putta på diverse saker etter innfallsmetoden. Materiala er for det meste frå papirhobbylageret: papir, løv, stoff, stempeltrykk, kakeserviett, aluminiumsfugl, stoffteip og maling.

Det sjarmerande gamle stoffet med turkise roser har eg kjøpt på gjenbruksbutikken. Dessverre er kvaliteten for dårleg til at eg kan sy noko særleg av det, men no får det jo vise seg litt fram på veggen!

Velkommen inn i vår nye gang

Tadaaa! Endeleg ferdig. Det er rett nok nesten ei veke sidan, men eg har ikkje somla meg til å knipse og blogge om det før no. Eg er kjempefornøgd! Og veldig fornøgd med mannen som har lagt ned masse arbeid her. Han blir veldig engasjert når han har eit prosjekt, og somlar ikkje vekk tida når han har eit mål. Det likar vi! Og takk til pappa, som har lært opp mannen til å legge fliser!

Sjølv har eg tatt meg av maling av dører og karmar, samt fuging av flisene. Og litt hjelp til montering av skap. Og så har eg laga det knallblå bildet og puta på entrebenken. Vi trengte eit par fargeklattar. Enno er ikkje alt heilt som det skal vere, men det er berre småting som gjenstår. Kommode under bildet, og under trappa. Ei vertikal knaggrekke, nøkkeloppheng, fleire bilder osv. Det er synd eg ikkje fekk tatt før-bilder, for forskjellen er temmeleg stor…

Bildet over er tatt frå inngangsdøra. Bildet under er frå trappa. Velkommen på besøk!

Krakk blir ny

Denne mindre tiltalande krakken blei med meg heim frå eit loppemarked i haust fordi den hadde ein tiltalande pris. Eg hadde lenge tenkt at vi skulle hatt ein krakk i huset, og fekk umiddelbart idear til kva eg kunne gjere med denne. Men det tok si tid før eg fekk dei ut i livet…

Og slik ser den ut i dag, der den står i stova og kosar seg ilag med teakbordet og Petrastolen. At vi blandar ulike typar treverk er ikkje noko nytt, og heller ikkje noko vi bekymrar oss for. Men vi skulle gjerne hatt lyst tregolv i stova! Drømme, drømme…

Vil ha!

Eg skulle aldri sett denne reolen i eit blad. Den kostar altfor mange pengar, og er heilt uaktuell å kjøpe. Men eg klarar ikkje la vere å drøyme om den likevel. Syns den er så kul! Og vi er på utkikk etter eit hylleliknande møbel til stova. Kan nokon lage ein sånn til meg skal tru?

(Bildet er lånt frå Bolia.com)

Litt kjøkkenprat

Eit lite innblikk i kjøkkenet vårt. På veggen har vi ei gamal teakhylle funne på bruktbutikken, fylt med gamle bilete, muggar og glas. Skiltet på veggen seier «I’m not bossy – I just have better ideas». Eg kjende meg igjen i teksten, og måtte berre ha det…Til venstre kan du skimte trådlampa eg lagde for nokre månader sidan. Den er original, og eg har ikkje blitt lei enno. Men det kjem vel til det punktet før eller seinare, som med så mykje anna eg lagar sjølv.

Som du nok har skjønt likar vi å mikse gamalt og nytt. Den høge stolen (bildet kappar beina veldig) har eg  blogga før. Den tilhøyrde bestemora mi, som hadde den på sitt kjøkken. Deretter havna den hos tante, for så å bli min. Eg brukar den ikkje så ofte, men eg likar den så godt! Berre så synd at dei to trinna som opprinneleg høyrde med ikkje lenger er der.

Klokka er nok eit bruktfunn, til den nette sum av 30 kroner! Opprinneleg var det ei opptrekksklokke som hadde slutta å fungere. Etter å ha dratt vekk urverket (for eit makkverk av tannhjul og spolar!!) og sett inn eit kvartsverk frå clas ohlson fungerar den no utmerka. Men døgnet har fortsatt berre 24 timar.

Nytt vaskerom

Ein av dei tinga vi var minst fornøgde med då vi kjøpte huset vårt i fjor var badet. Det er eit stort rom, og potensialet er bra den dagen vi tek til å pusse opp. No har vi teke det første steget, som var å kaste ut vaskemaskina og lage vaskerom i boda ved sidan av. Det var ei romsleg bod, med mange store, djupe hyller som var spikra opp på ein temmeleg provisorisk måte av tidlegare eigar. Veggane hadde ulike fargar, og golvbelegget var slitt og fullt av malingsflekkar. Dessverre har eg ikkje skikkelege førbilder! Rommet hadde allereie innlagt vatn og sluk i golvet sidan varmtvannstanken står der, og difor var det mykje som kunne gjerast utan å måtte ruinere seg på å bruke fagfolk. Og heldigvis har eg ein mann som er både handy og glad i fornying og system!

Resultatet er vi begge kjempefornøgde med, for no har vi både vaskerom og bod i eitt. Rommet er praktisk, og likevel stilreint. Bak forhenget i hjørnet har vi forsøkt å skjule varmtvannstanken og sentralstøvsugaren, samt panelet for hovudvasskrana. Der er også plass til å sette tørkestativa når dei ikkje er i bruk. På ikea fann vi eit snertent vegghengt tørkestativ som kan brukast for mindre vask. Dette kan slåast ned når det ikkje er i bruk, og tek ikkje plass over benken. På det samme opphenget vil det komme ei hylle eller to når vi får kjøpt det. Kjøkkeninnreiinga er frå det samme varehuset. Benkeplata har ei høgde som gjer den super når eg skal skjære stoff og drive med syprosjekt. Hobbyrommet er berre eit par skritt unna. Her kan vi slå mange fluger i ein smekk!

No gjenstår det å bestemme seg for kva vi vil gjere med badet. Det blir ein langt meir omfattande jobb, og vil gjere eit skikkelig innhogg i lommeboka. Difor har vi tenkt å bruke god tid på idèmyldring og planlegging. Vi har huset fullt av interiørmagasin og baderomskatalogar. Alle tips blir mottekne med takk!

Og ein ting til…

Eg gløymde å ta med bildet vi har fått opp på veggen. Det har mangla noko på veggen mellom dei to skyvedørene i stova, og eg har lenge hatt planar om å trekke stoff på ei ramme frå ikea. Etter eg var ferdig med å trekke om stolen, slo det meg at eg kunne bruke restar av stoffet på veggen. Og som tenkt så gjort. Det blei kanskje litt «tungt», sidan det er mørke fargar, men det kan no få henge ei stund iallefall.